LEGAZPI CITY- Makolor asin maogma an naging pagsabat kan mga Albayano siring man kan mga turistang nagbisita sa provincia sa pormal na pagbubukas kan Magayon Festival 2017.
Sa intrevista kan Bombo Radyo ki Governor Al Francis Bichara, inihayag kaining wara man dakol na ipinagbago an selebrasyon sa ika-18 taon kaini kun saen ipinagpadagos man sana suboot kan mga nakaaging gobernador an kaogmahan na hatod kan kapiestahan.
Ibinida pa kan gobernador an dakol na pamosong pangaran na dapat suboot na antabayanan sa mga masunod na aldaw sa sarong bulan na selebrasyon siring na sana ninda Sarah Geronimo asin iba pang artista mientras na piglalaoman na an pag-abot kan mga PBA stars.
Personal pa kaining inimbitaran an mga bisita para sa aro-aldaw na aktibidad katakod kan month-long celebration.
Mientras tanto, naglalaom man an gobernador na magkakaigwa nin kasimbagan an mga grievances kan mga empleyado katakod kan Labor Day observance kasuodma.
Sa isyu man kan wage hike sa rehiyon, pighahalat na sana suboot kaini an kaluluwasan kan pag-oolay kan mga concerned agencies alagad nahahandal si Bichara sa magigin epekto kan lakdang sa mga saradit na negosyo.
