LEGAZPI CITY- Ipigpipreparar na kan mga otoridad an kasong isasangat kontra sa suspek sa pamumukpok sa sarong maga-abaka kan Brgy. Lictin, San Andres, Catanduanes.
Sa nagunong impormasyon kan Bombo Radyo Legazpi napag-araman na nag-iinuman sa laog kan barracks an biktimang binistong si Edgardo Soleybar, 47 anyos kaibanan an suspek na nabisto sa pangarang “Lagi” kan magkaigwa nin mainit na argumento.
Huli sa tindi kan pag-iiwal kan duwa, sinapak suboot kan suspek an biktima mientras na nakakua man nin pamukpok an biktima.
Nadangog kan construction worker na si Argebal Lumabi an komosyon kun kaya nagbalong mag-awat alagad dae napugulan an duwa kaya nagdesisyon na mag-apod pa nin kaiba alagad sa pagbabalik kaini sa barracks kaibanan an inapod na tabang, nahiling na sana na nagkakarigos na sa sadiring dugo si Soleybar huli sa sinapar na tama sa walang talinga mientras na nagdulag naman sa dae pa maaraman na direksyon an suspek na sa ngonian an padagos pang pighahanap.
