LEGAZPI CITY – Dakop an mag-ama sa isinagibong manhunt operation kan kapulisan sa Sitio Asid-Asid, Brgy. Jamorawon, Milagros, Masbate.
Binisto an mga akusadong sinda Manolito Apalit alias Moling, miembro kan Larangan 2 (L2), Komite ng Probinsya (KP) 4-Masbate, 56-anyos asin Argie Apalit alias Adgie/Argie, miembro kan L1 KP4, 33.
Inarestar ini kan pinagsarong puersa kan Masbate 1st Provincial Mobile Force Company; Masbate Provincial Intelligence Unit kaibanan kan RMFB5; CIDT-Masbate; PIT5-Masbate; 96 MICO; asin Milagros MPS.
Nahahampang si Manolito sa kasong multiple attempted murder asin 3-counts of murder sa manlain-lain na petsa kan mandamiento de aresto.
Mantang pigsisirbihan nin arrest warrant si Manolito, nadangog kan mga pulis an saro pang nag-ookupar sa harong na marikas na nagluwas sa maawot na porsyon alagad tulos man na nadakop.
Digdi nakumpirmar na ini an aki ni Manolito na nakuwaan nin duwang improvised explosive device (IEDs) asin caliber .45 pistol na may anom na bala.
Nagpalyar man ining magpresentar kan magkakanigong dokumento sa pagdara kan nasabing armas.
Nasa kustodiya na ini ngunyan kan Milagros Municipal Police Station mientras na pighahanda na an magkakanigong kasong kakahampangon ni Argie.
