LEGAZPI CITY – Dakula an panghihinayang ngunyan kan mag-agom na negosyante sa syudad kan Legazpi makalihis na malalay an saindang mga pagrugaring na nagkakantidad nin P200,000.
Sa intrevista kan Bombo Radyo kay Legazpi PNP spokesperson Police Senior Insp. Milet Tillos, nabisto an mga biktima na sinda Christian Borja asin agom na si Delilah Borja na residente kan Barangay EMs Barrio East, Legazpi City.
Segun digdi, pigkukuwaan suboot nin ladawan kan mga biktima sa lava fountaining sa Bulkang Mayon kaya dae narisa kan mga ini na nalaog na sinda nin parahabon.
Nagluluwas sa inisyal na imbestigasyon na nag-agi an suspek sa balkonahe kan ikaduwang palapag kan saindang harong.
Kaibanan sa mga nalalay kan suspek an mga mamahaling mga cellphone, mga bag asin USB.
Mientrastanto, nagpapadagos man ngunyan an ipigsasagibong imbestigasyon kan mga tauhan kan Legazpi City Police Station para sa pagkakadakol kan dae oa nabibistong suspek asin posibilidad na mabawi an mahabon na mga gamit.
Katakod kan insidente, liwat na nagpagirumdom an mga otoridad na magin malikay sa saindang mga gamit asin magtenir na mapagbantay.
