LEGAZPI CITY — Nag-apela an hepe kan Legazpi City Police sa gabos na sektor na ibitaran an pag-explore o paglaog sa mga danger zones kan nag-aalburutong Bulkang Mayon.
Segun ki Pol. Supt. Nilo Berdin Jr, nagkaolay na sinda ni Mayor Noel Rosal kaiba an mga ATV operators asin liwat na ipinagirumdom an ‘no human activity’ sa danger zones.
Nagpromesa man suboot an mga operator na masunod sa kasuguan kan alkalde maging kan PNP.
Alagad maduong sinabi ni Berdin na oras na may magbalgar sa kasuguan, tulos ining dadakupon, i-impound an lunadan asin magibo nin report na isusumite sa Department of Tourism para sa kanselasyon kan saindang accreditation.
Hagad ni Berdin an kooperasyon kan gabos maging kan mga turista ngani na maibitaran an anumang remalaso na pwedesir mangyari urog na dae pa sierto kun nuarin matatapos an pag-aalburuto kan bulkan.
Tinawang duon pa kan hepe na piggigibo kaini an saindang trabaho sa ibong kan kakulangan nin personahes asin kadakol na pig-aatendirang trabaho.
