LEGAZPI CITY – Personal na nagkondukta nin inspeksyon an pamayo kan Albay Police Provincial Office sa mga sementeryo ngonian na Undas.
Segun ki Albay Police Provincial Office Provincial Director Police Colonel Noel Nuñez na ginibo niya an nasambitang lakdang nganing masyerto niya mismo an kaligtasan kan mga Albayanong nagpapasiring sa mga kamposanto.
Afuera suboot sa saiyang paglilibot an uminabot sa 1,500 an numero kan mga kapulisan na ipigdeploy sa 68 na mga sementeryo sa provincia mantang 49 man na police assistance desk na pigpapangenotan kan 472 police personnel.
Kasabay man ninda sa pagbabantay an Armed Forces of the Philippines, Bureau of Fire Protection, Philippine Coast Guard, asin iba pang volunteer mantang may presensya man kan kapulisan sa mga terminal, aeropuerto, asin pantalan.
Pigtaram pa kan opisyal na poon kasuhapon an nagtetenir na generally peaceful an saindang monitoring para sa pag-obserba kan undas.
Pigsyerto niya man na may supisyenteng pahingalo an mga naka-standby na mga kapulisan nganing dae man malaag sa alanganin an saindang salud sa pagtatao sana nin serbisyo sa saindang nasasakupan.
Pangapodan ni Nuñez sa mga cemetery goers na dae magduwang isip na magdulok sa mga kapulisan kun may kaipuhan nganing matabangan sinda sa saindang pagbisita sa saindang namaaram na padangat sa buhay.
