LEGAZPI CITY – Pigduon kan Bayan-Bicol na apektado kan planong jeepney phase-out kan Duterte administration an nasa poco mas o menos 650,000 mga drayber asin 200,000 saradit na operator.
Nagtutubod man an nasambitan na grupo na an mga dayuhan asin darakulang korporasyon sa transportasyon sa nasyon an makikinabang sa propuestong Jeepeney Modernization Program.
An planong ini suboot an makua sa papel kan mga driver asin operator na dekada nang nagtatao nin serbisyo sa publiko.
Marurumduman na pighayag kan gobyerno na an Jeepney Modernization Program suboot an kasimbagan sa matinding trapik sa Metro Manila kun sain an mga jeep an pigtuturong rason kan nasambitan na gubot na trapiko.
Kinakaipuhan suboot na halion na sa tinampo an jeep na nasa edad 15 taon asin salidahan nin mga electric jeepney asin Euro 4 engine na gibo sa ibang nasyon.
Pigduon man kan Bayan Bicol na bako garantiya kun marahay an serbisyo, magigin salbado an publiko asin mababa an pamasahe kun an mga darakulang negosyante an makapot sa pampublikong transportasyon.
Urog suboot na malangkaw an singil sa pamasahe huli sa padagos na paglangkaw kan singil sa kuryente asin presyo kan petrolyo na magigin dugang sa kadifisilan kan mga nagtitios na namamanwa.
