LEGAZPI CITY — Pupunan na kan mga opisyal hale sa Presidential Anti-Corruption Commission (PACC) sa masunod na semana an pagbisita sa mga barangay health stations sa Bicol.
Katakod ini kan mga pigsasabing iregularidad sa pagpapa-construir kan multi-billion rural health units kan Department of Health (DOH) sa paagi kan pagdivert kan P10.6 billion health fund hale sa Philippine Health Insurance Corporation (PhilHealth).
Sa intrevista kan Bombo Radyo Legazpi ki PACC Bicol affairs head Eve Monilla na igwang 298 health units sa rehiyon partikular na sa Albay asin Catanduanes susog sa initial data na kapot kan komisyon.
Napag-araman na apat sana na Albay school-based health stations an nakaabot na sa 91.88% completion asin saro man an 88.88% work accomplished sa Catanduanes.
Kadaklan man sa mga ini an nasa ‘almost done phase’ na pad completed sana o flooring mantang an iba man an kulang sa structural element, installed panel and roofing asin warang electrical, fixtures and plumbing work.
Mientras tanto, pighihiling na madudugangan pa an nasabing numero en kasong matapos na man an pagdeterminar sa iba pang mga provincia sa rehiyon.
Nakipagkoordinar naman an PACC sa Department of Education (DepEd) asin Department of Health (DOH) sa isinagibong meeting sa opisina ni Presidential Adviser on Bicol Affairs Usec. Marbel Clavecilla.
