LEGAZPI CITY – Puon ngonyan na aldaw, bawal muna si Presidential Anti-Corruption Commission (PACC) Commissioner Manuelito Luna na magluwas nin mga pahayag gamit an pangaran kan komisyon.
Enot nang inuran nin pagkondenar an apela ni Luna na imbestigaran kan National Bureau of Investigation (NBI) si Vice President Leni Robredo sa suboot pakikipagkompetensiya sa tabang kan gobierno sa mga apektado kan “coronavirus crisis”.
Liwat na ipigduon ni PACC chairman Dante Jimenez sa intrevista kan Bombo Radyo Legazpi na warang kinaaraman an komisyon sa pahayag ni Luna na inuran nin pagtuyaw.
Aram man suboot ni Jimenez na dae sakop kan mandato an pighahagad na lakdang ni Luna huli ta susog sa Executive Order 43 na nagcrear sa PACC, solamenteng presidential appointees an sakop kan imbestigasyon.
Imbes na tuyawon an gibo kan iba, dapat pa suboot i-welcome gabos na tabang na ipigpupunto man kan ley na “Bayanihan to Heal As One Act”.
Dugang pa ni Jimenez na igilid na muna an pulitika asin dawa anong kolor kan partido hali, magkasararo sa pagtatrabaho para sa mga apektado.
