LEGAZPI CITY-Nagkaigwa nin bahagyang sagutan sa pagulatan ninda House Justice Committee Chair Gerville Luistro asin Ako Bicol party-list Rep. Alfredo Garbin Jr. katakod kan SALN ni Vice President Sara Duterte.
Punto ni Garbin, na an SALN na pigtutukoy na igwang “material misdeclaration” o “untruthful declaration”, iyo an dae naka-attach sa impeachment complaints.
Sinimbag man ini ni Luistro na bako pa ini an pinag-oolayan kan komite, alagad sinabi ni Garbin na kan pinagbotohan an sufficiency in substance kan mga reklamo, kabale an annexes o mga katakod na dokumento.
Nilinaw man ni Luistro na an pag-isyu kan subpoena, bako ngani dagdagan, suportaran o itama kun ano an nakalaag sa impeachment complaint, kundi ngani busisihon kun bastante an reklamo para sa existence kan probable cause ngani matawan nin giya an panel members sa paghatol.
Paliwanag man ni Rep. Joel Chua na basado sa Section 7 kan Rules of Procedure sa Impeachment Proceedings, igwang kapangyarihan an komite na mag-isyu nin “compulsory processes” para sa pagatendir kan mga testigo, asin produksiyon kan mga dokumento asin iba pang related evidence, kun saen laog an pagpapa-subpoena sa SALN sa irarom kan kapangyarihan kan komite.
