LEGAZPI CITY – Nahahandal an Land Transportation Office (LTO) Bicol sa padagos na paglangkaw kan numero kan mga aksidenteng nangyayari sa tinampo.
Saro sa pighihiling na rason digdi ni Mar Majistrado, LTO Bicol Chief, iyo an padagos man na pagdakol kan mga behikulong ipigluluwas sa merkado kun sain maski an mga jovenes, pigbabakalan na kan saindang mga magurang.
Nagkakawsa suboot ini nin pagkahandal sa ahensya huli ta limitado man sana an saindang tauhan na mabantay para sa road safety.
Kun kaya sigon ki Majistrado, naglalaom sinda sa tabang kan Philippine National Police (PNP) sa pag-deploy kaini nin mga tauhan na iyo man an nag-iimplementar kan Oplan Sita sa mga motorista.
Enot nang sinabi kan opisyal na dakulang katabangan sainda an pulisya sa pagsiertong madadakop an mga traffic violators asin libre sa ano man na aksidente an gabos na nasa tinampo.
Mientrastanto, katakod kan mga naiirehistrong paglangkaw kan road accidents, mawot ngunyan kan LTO Bicol na pakusugon pa an saindang enforcement activities bilang kasimbagan sa nasambitan na problema.
