LEGAZPI CITY- Nakikipag koordinar ngunyan an Land Transportation Office Bicol sa Sangguniang Panlungsod kan Legazpi dapit sa enforcement kan ‘New License Law.’
Kay kinaaraman digdi an merit system o kun warang dakop an sarong lisensyadong driver, entitled siya sa sampulong taon na validity kan lisensya mantang kun igwang demerit points, hasta sa limang taon na sana an lisensya kaini.
Segun ki Land Transportation Office Bicol Director Francisco Ranches Jr. sa intrevista kan Bombo Radyo Legazpi na an ciudad kan Legazpi an magtatao nin datos kan mga nadakop nindang mga motorista na may pagbayolar sa ley.
Paliwanag kan opisyal na enkasong dagos na maipaotob, magigin beneficial man ini sa lokal na gobierno kan Legazpi.
Dakula suboot an importansya kun nagkakaigwa nin sharing of data an lokal na gobierno asin an ahensya huli ta dae nadedeterminar gabos an mga violators.
Napag-araman na an sarong driver an dae makakapag renew nin lisensya kun dae nasi-settle an bayolasyon kaini sa lokal na gobierno.
Dugang pa ni Ranches na posible man na magkaigwa nin IT interconnectivity, basado sa magigin kasunduan.
Napag-araman na tutugutan kan Land Transportation Office an lokal na gobierno kan Legazpi City na ma-access an nagkapirang datos kan ahensya para sa mas matanos na implementasyon kan programa.
