LEGAZPI CITY- Nanindugan si Philippine Army Southern Luzon Commander Lt. Gen. Antonio Parlade Jr. na bakong unconstitutional an saiyang appointment bilang tagapagtaram kan National Task Force to End Local Communist Armed Conflict (NTF-ELCAC).
Kasunod ini kan committee report kan Senado na naghahagad sa paghali asin nagkukwestiyon sa pagkaag kay Parlade sa NTF-ELCAC sa ibong kan pagiging aktibong miyembro kan Philippine Army na suboot pagsuway sa probisyon kan Article 16 section 5 kan 1987 constitution.
Sa eksklusibong intrevista kan Bombo Radyo Legazpi kay Parlade Jr., tinawang duon kaining bako man na ahensya kan gobyerno kan NTF-ELCAC alagad sarong task force na binilog sana ngani na magsimbag sa sarong problema na iyo an insurhensya sa nasyun.
Huli digdi, wara nin rason ngani na limitaran an mga suldado, pulis asin iba pang uniformed personnels na maglaog sa ELCAC lalo pang si Presidente Rodrigo Duterte mismo an nangengenot kaini.
Posible suboot na politika sana an rason kan nagkapirang mga senador na pagpaluwas kan report lalo pang paparani na naman an eleksyon asin nangangaipo nin atensyon kan publiko.
Mientras tanto, sa tahaw kan mga kontrobersiya nanindugan man si Parlade na preparado siyang magbaba sa pwesto bilang tagapagtaram kan ELCAC kung tutugotan na kan task force asin ni Presidente Duterte.
