LEGAZPI CITY – Dae nagibong makaluwas sa harong an sarong 86-anyos na lola makalihis na magbungkaras an kasulo sa pig-iistarang kubo kan biktima.
Gadan na kan madiskubre si Jertrudes Gajardo Luber, balo asin residente kan Sitio Sapran, Brgy. Sta. Fe, Pilar, Sorsogon.
Sa inisyal na imbestigasyon kan Pilar Municipal Police Station, pigtutubudang matanga kan Nobyembre 6 kan magbungkaras an kasulo.
Nariparo suboot kan aki kaining si Susan na nagkakalayo na an kubo na pigteteniran kan ina na gibo sa light materials.
Alagad dae naman nagibong maisalbar an ina kaini na na-trap na sa laog kan kubo.
Kaibanan sa pighihiling na pinagpunan kan kasulo an gasera na pigagamit kan gurang na ilawan kun banggi.
Nag-aabot man sa P3, 000 an kabilugang kantidad na nagin resulta kan nasabing insidente.
Isinairarom naman an lawas kan biktima sa autopsy examination.
