LEGAZPI CITY—Inanod nin baha an sarong 61-anyos na lola asin an apo kaini na nuwebe anyos makalihis an warang patod na pag-uuran sa probinsya kan Albay.
Segun ki Bacacay MDRRMO Head, Bryan Berdin, sa intrevista kan Bombo Radyo Legazpi, nangyari an insidente sa Purok 5, Barangay Bonga, sa banwaan kan Bacacay kan naunambitang probinsya.
Pigtaram kan opisyal na bako man labi an baha sa lugar alagad napalos an biktima sa kanal na medyo marikas an bulos kan tubig asin naanod na an mga ini.
Segun sa mga nakahiling kan insidente na mantang naglalakaw an mag-lola, napalos an apo kaini asin kan pigbalo niyang iligtas ini digdi naman nakasabay an lola sa pagkakaanod.
Naenot na nakua an lawas kan lola sa salog sa may parte kan Purok 8 kan nasambit na barangay, asin pigdara pa kuta ini sa ospital alagad binawian na nin buhay.
Sa presente, an apo kaini an nawawara pa asin padagos pang pighahanap kan mga otoridad.
Mientrastanto, nagpagiromdom man an opisyal sa namamanwaan na mag-ingat asin makipagkooperar sa mga opisyal en kaso na sinda ipigpapaebakwar na.
