LEGAZPI CITY- Nagkondusir nin paglilinig an mga residente kan Barangay Anoling, Camalig, Albay sa Tagaytay Elementary School na nagserbing evacuation center ninda durante kan haros pitong bulan na aktibidad kan bulkang Mayon.
Segun ki Kapitan Mia Alemania sa intrevista kan Bombo Radyo Legazpi na antes an decampment, pinakarahay muna an pigteniran na mga classrooms.
Napag-araman na nasa 123 pamilya an nag-decamp na ngunyan na aldaw kasunod kan pagbaba sa alert level 2 kan bulkang Mayon.
Alagad segun sa kapitan na saro sa mga angat ngunyan, iyo an liwat an pagbangon asin pagpupuon kan mga residente, urog na an mga naapektaran an kabuhayan huli sa Mayon unrest.
Marurumduman na mayorya sa mga apektadong residente an pagtatanom an pangenot na kabuhayan na labing naapektaran huli sa aktibidad kan bulkan.
Mientras tanto, nakikipag koordinar na man an lokal na gobierno kan Camalig sa Albay Electric Cooperative ngani na maibalik an suplay kan kuryente sa mga kaharungan na nasa laog kan 6km radius permanent danger zone.
