LEGAZPI CITY—Ikinahandal kan grupo kan mga tsuper na baad posibleng pag-adalan liwat an mapadapit sa plano kan modernization program sa bagong liderato kan Department of Transportation.
Magigiromdoman na inilipat na an dating kalihim kan nasabing ahensya na si Vince Dizon bilang bagong secretary ngunyan kan Department of Public Works and Highways (DPWH).
Mantang sa presente an iniribay man na bagong kalihim kan Department of Transportation (DOTr) si Acting Secretary Giovanni Lopez.
Segun ki Pagkakaisa ng mga Samahan ng Tsuper at Operator Nationwide (PISTON) National President Mody Floranda, sa intrevista kan Bombo Radyo Legazpi, pigkahadit ninda na magbalik sa pag-aadalan giraray an nasambitang plano huli sa kan panahon ni dating DOTr secretary Dizon ipighayag man suboot kaini na pag-aadalan man suboot an nasabing isyu.
Ipigkahadit ninda ini huli ta haros pira nang taon pigpapangapudan kan mga jeepney driver asin operator an nasabing propwesto, na kun hihilingon pirme na sanang pig-aadalan an kabuhayan asin direchos sa orolay nin serbisyo kan namamanwaan.
Tinawan-duon man ni Floranda na pira nang taon na pigkakawatan suboot kan gobierno an kabuhayan kan mga operator asin drivers.
Pangapudan kan grupo sa bagong liderato kan DOTr na pag-adalan kan ahensya an saindang mga ipigbubusol na programa, asin tugutan muna sindang makapag-renew asin makapagrehistro kan saindang mga prangkisa nganing makapaghanap-buhay an mga operator asin tsuper
Siring man nganing padagos na makapagtaong serbisyo urog na ngunyan na nadididificilan an mga commuters huli sa dakulang kakulangan kan pampublikong transportasyon sa nacion.
Dugang pa ni Floranda na dapat hilingon kan bagong kalihim kan DOTr an mag-inibong na lado asin hilingon an kaimportansyahan kan sektor nin transportasyon sa pagpapauswag kan ekonomiya kan nacion.
