LEGAZPI CITY — (UPDATE) Pigpa-plano ngonian kan mga otoridad na sangatan nin kaso an suboot suspek sa nangyaring pagkakakuryente asin pagkagadan kan sarong trabahador sa Barangay Rawis, ciudad kan Legazpi.
Binawian nin buhay si Raymark Romero, 23-anyos makalihis na makadukot an bitis kaini sa live wire na nakaluyloy sa salog.
Segun ki Kapitan Joel Orosco, iligal na nakakabit suboot an kuryente sa sarong harong asin ibinugtak an wire sa may salog. Base man sa naging imbestigasyon kan pulisya, may duwang suspek sa insidente na pigpatotoohan man kan witness.
Dugang pa ni Orosco, pighinguwa ninda na pasurendiron an mga suspek alagad garong nagtatago suboot ini kun kaya plano na sanang i-regular filing.
Pwedesir man suboot na magreklamo an Albay Power and Energy Corporation (APEC) huli sa illegal connection sa barangay.
Namundo man an opisyal huli ta dae maaaraman an iligal na gibo sa lugar kun dae pa nangyari an insidente.
