LEGAZPI CITY- Nagpasaklolo na sa pulisya an live-in partner kan saro sa mga testigo sa panggagadan ki Ako Bicol Party-list Representative Rodel Batocabe huli sa naresibeng huma sa buhay.
Sa ekslusibong intrevista kan Bombo Radyo Legazpi ki SPO2 Theresa Malto, investigator on-case kan Oas PNP, nagkukubog-kubog pa sa takot kan magdulok sa mga pulis asin magpatabang sa Barangay San Juan, Oas, Albay si Lani Bataller, 30-anyos.
Susog sa salaysay ni Bataller sa mga otoridad, duwang dae pa nabibistong lalaki na anas naka-bonnet asin magkasunad sa sarong blue na motorsiklo an nag-ulang saiya, nanutok nin badil sa daghan saka nagsabi na gagadanon siya asin an tulong aki na anas nasa elementarya pa sana, kun dae mahihiling an ka-live in na si Andy Yuson.
Si Andy an nagtitindog na saro sa mga testigo sa kaso kan ginadan na lehislador asin tugang kan ipigtutukdong main gunman na si Henry Yuson.
Segun pa sa imbestigador, nagtutubod suboot si Bataller na mga tauhan ni incumbent Daraga Mayor Carlwyn Baldo an duwang lalaki huli sa isyung kinasabitan kan agom.
Sa presente, padagos pang pig-aaram an pagkakabisto kan mga suspek na tulos man na naghali makalihis na maghuma mantang nagtetenir na an bilog na pamilya sa kustodiya kan sarong government agency para sa seguridad.
