LEGAZPI CITY — Magkakaigwa nin amay na preparasyon an Police Regional Office (PRO) 5 para sa paparaning 2019 elections.
Sa intrevista kan Bombo Radyo Legazpi ki PRO5 spokesperson Police Chief Inspector Malu Calubaquib, nagkaigwa na sinda nin command conference kaibanan an mga regional directors sa kada provincia ngani na ipresentar an guidelines na ibinaba kan national headquarters.
Pinaglalaoman na mas papakusugon asin mas mahigot an ipapaotob na seguridad kan PNP ngani na mapunuan an nagkapirang mga lapses kan nakalihis na pirilian sa ibong kan matrayumpong pagbabantay kan binilog na task force.
Segun ki Calubaquib, an limitadong resuffling kan mga hepe kan pulisya sa kada banwaan asin ciudad sa rehiyon an parte kan saindang security asin contingency plan.
Pag-eksplikar kan opisyal, kinakaipuhan na an mga chief of police an nasa area na apat na bulan antes an pirilian ngani na makapaglatag na kan saindang mga plano.
Mientras tanto, bukas man an PNP na magtaong seguridad sa mga kantidadato na mahagad nin asistensya.
Nahihiling man ni Calubaquib na an bukas na komunikasyon an saro sa mga makakatabang ngani na magin matoninong an pirilian huli ta natatawan nin kasimbagan an gabos na pangangaipo kan publiko.
