LEGAZPI CITY — Naideklarar nang klarado sa iligal na droga an lima sa 16 na barangay sa ciudad kan Legazpi na kaibanan sa seriously affected barangays pag-abot sa impluwensya kan iligal na droga.
Ini an kinumpirmar ni Legazpi City Mayor Noel Rosal kasabay kan pagsierto na nagpapadagos man giraray an monitoring ninda sa mga ini.
Pagbuyagyag pa kan alkalde na target tapuson an Community Base Rehabilitation Program sa Agosto ngani na matabangan makapagbagong buhay an mga drug surrenderees.
Aminado man an opisyal na dakol na mga drug surrenderees an nag-uutik kaya pag nadakop an mga ini na liwat na nagbalik sa iligal na aktibidad, pwedesir na sindang masangatan nin kaso.
Segun pa ki Rosal, da man nangangahulugan na protektor na kan mga drug personalities kun igwang kabistong drug pushers basta dae pigkokunsinte an mga ini.
Dugang pa kaini na kinakaipuhan munang magsurendir sa mga otoridad ngani na matabangan na makapagsairarom sa rehabilitation program an mga minsan ng naimbwelto sa ipinagbabawal na bulong.
