LEGAZPI CITY — Nabawasan na an mga drug affected barangays sa syudad kan Legazpi susog sa deklarasyon kan City Drug Abuse Council (CDAC.)
Sa ekslusibong intribista kan Bombo Radyo Legazpi ki Rick Fontanilla kan CDAC, binisto kaini an limang drug-cleared barangays na iyo an Cagbacong, Imalnod, Bagacay, Bariis asin Lamba.
Klinaro ni Fontanilla na bako ini kasabay sa desi-sieteng seriously drug-affected barangays sa Legazpi.
Aprubado na suboot kan Philippine Drug Enforcement Agency (PDEA) Bicol an pagka-klarado kan mga ini sa droga asin isusunod na an Barangay Bitano, Victory Village asin Penaranda kun sain magkakaigwa nin validation asin seminar para digdi sa masunod na semana.
Sienerto kan opisyal na sinunod ninda an itinalaan na parameters kan PDEA antes an nasambitan na deklarasyon.
Habo man kaya suboot ni Mayor Noel Rosal na maghidale huli ta mawot kaining masierto na talagang klarado na sa ipinagbabawal na bulong an sarong lugar antes ini ideklarar na drug-cleared.
Makalihis an proseso sa tulong barangay, isusunod na an iba pang drug-affected hasta sa matapos sa itinalaan na target deadline sa bulan kan Mayo o Hunyo.
Ipigheras man ni Fontanilla na magkakaigwa nin community-based rehabilitation para sa mga dating imbwelto sa iligal na droga na mawot nang magbagong buhay.
