LEGAZPI CITY — Dae mapaawat an mga lokal asin dayuhang turista sa pagbisita sa mga famosong tourist destinations sa probinsya kan Albay sa ibong kan labing init kan panahon.
Ini huli na man sa bakasyon na pigsusulit kan kadaklan urog na an mga estudyante.
Katakod kaini, naintribista kan Bombo Radyo Legazpi an kahera sa entrance kan famosong bulod sa banwaan kan Daraga- an Ligñon Hill.
Segun ki Jean Baldomero, dae man maisasayumang mas dakol sindang bisita kan Semana Santa kun sain sa peryodong ini, nabawasan nin diit an mga nagdadayo sa lugar.
Ipinagbabawal sa pagsakat sa nasambitan na bulod an arak, gitara, skateboard, bola asin iba pang gamit na pwedesir na magkrear nin kariribokan o istorbo sa ibang nagpapasyar digdi.
Bente-singko pesos an saindang pinaghahagad na entrance fee bilang pambayad sa tubig, kuryente, sweldo kan mga empleyado asin maintenance.
Segun pa ki Baldomero, dakula an diskwento sa mga Albayanong nagbibisita sa Ligñon Hill na mabayad na sana nin dyes pesos kun igwa nin ID na magpapatotoong naka-istar sa probinsya.
Kataning an Ligñon Hill kan Albay Park and Wildlife na saro pa sa mga pigdadayong lugar sa probinsya.
