LEGAZPI CITY — Naarestar na kan mga otoridad an lider kan Galing Drug Group sa ciudad kan Sorsogon sa ginibong buy bust operation.
Dinakop kan pinagsarong pwersa kan Sorsogon PNP asin Philippine Drug Enforcement Agency (PDEA) Sorsogon an 34-anyos na lider kan gang na si Robert Tapalla Galing alyas Galing na residente kan Barangay Polvorista kan nasabing ciudad.
Si Galing an nasa listahan kan PNP bilang High Value Target (HVT).
Narekober kan mga otoridad sa ginibong search an 13 pidaso nin sachet kan pigtutubudang shabu, duwang cellphone, sarong caliber 45 col (pellet gun) na may sarong magazine asin an motorsiklo kan suspek.
Apwera pa ini sa ipinabakal na sarong sachet sa police poseur buyer asin an P500 na buy bust money.
Nagtetenir ngonian sa custodial facility kan Sorsogon CPS an suspek magin an nakumpiskang ebidensiya na isasairarom sa laboratory examination.
Ipighahanda naman an kasong isasangat sa suspek na pagbayolar sa Article II Section 5 asin 11 kan Acta Republika Numerado 9165 o Comprehensive Dangerous Drugs Act of 2012 asin Acta Republika Numerado 10591 katakod kan Omnibus Election Code.
