LEGAZPI CITY — Nagtutubod si AKO-Bicol Party-List Rep. Rodel Batocabe na labing importansya kan pagtatao kan hustisya sa mga pamilya kan nagadan na onseng suldados sa “friendly fire” incident sa Marawi City.
Dawa pa dae man piglalaoman an insidente, tinawang-duon ni Batocabe na bako ini ‘unsusual occurence’ asin nangangaipo nin hirarom na imbestigasyon kun igwang mga personahes na kinakaipuhang mapanimbag mientras na kun magpositibo an pigtutubudan kaini, court martial suboot an masunod na lakdang.
An court martial an judicial court para sa mga miembro kan pwersa armada na inakusaran nin mga kaso na kontra sa ley kan mga militar.
Sa ibong na lado, kun wara man, importanteng gibuhon na sana ining leksyon na dae na mangyari pa sa masunod.
Magigirumduman na nakikipaglaban an pwersa kan gobyerno sa ISIS-linked Maute Group members sa Lanao del Sur kan mapasala na tuminama an airstrike na para kuta sa kalabang grupo.
