LEGAZPI CITY – Pinunan na kan lokal na gobyerno kan Virac an pagdadakop sa mga buhing ataman na ikos asin ayam sa kada baranggay.
Segun kay Samuel Laynes, Virac Municipal Mayor sa intrevista kan Bombo Radyo Legazpi, makalihis magtapos sa training an mga dog enforcers kan munisipyo, tulos ining ipigdesignar sa mga barangay na igwa nin na-monitor na halangkaw na numero nin mga stray animals.
Siniguro man kan opisyal na dae papabayaan an mga nadakop na hayop huli sa bagong impounding asin animal shelter facilities kan banwaan.
Ini suboot saro sa mga lakdang ta nganing mamantenir kan lokal na gobyerno an pagiging ‘rabies-free municipality’.
Mawot man kan alkalde na mabawasan ang mga naitatalang aksidente na kung sain mayormenteng nagiging kawsa iyo an mga balawbagaw na hayop sa mga tinampo.
Sa ngunyan, target pa kaining makapagpa-training nin mga dugang na dog enforcers nganing malibot an bilog na munisipyo magin an mga hararayo o isolated na barangay.
Mientrastanto, apwera sa pagtutok kan LGU sa mga buhing hayop, padagos man an isinasagibong mahigot na monitoring kan border entry makalihis makapagrehistro an Municipal Agriculture’s Office nin aktibong kaso kan African Swine Fever o ASF sa sarong lugar, partikularmente na sa barangay Calatagan, kan nasambit na banwaan.
Sinierto man kaini na magsasagibo nin depopulation sa mga karatig-barangay enkaso may palatandaan pa kan naunambitang helang.
