LEGAZPI CITY — Personal na nagpasiring sa Japan si Legazpi City Mayor Noel Rosal ngani na mahiling an mga ekipahes na pigagamit kan nasambitan na nacion sa pagsasagibo nin organic fertilizer na nakatalaan na i-adaptar kan ciudad.
Segun sa alkalde, nagkakantidad nin P20 million an makinang dadarahon sa ciudad ngani na magamit sa pagsasagibo nin pataba sa pananom na hali sana sa mga biodegradable materials asin ati kan manok.
Marurumduman na enot ng inanunsyar an pagkakaigwa nin composting facility na gigibuhon para sa mga biodegradble materials na parte pa kan septage ordinance kan LGU Legazpi.
Pagbuyagyag ni Rosal, an enot na produkto na magigin resulta kan organic farming an ipapanao pa nin libre alagad an mga masunod an ipapabakal na huli ta kinakaipuhan man magkaigwa nin ganansya kan ciudad.
Pigduon kan opisyal na maugma siyang mahiling na nagtatalubo an ekonomiya kan Legazpi kaya dae sasayangon an magagayon na mga programa asin oportunidad para sa mga namamanwa.
Mientras tanto, nakatalaan man suboot na magkua an gobierno kan Japan nin dugang mga skilled workers huli sa nahiling kaining higos asin dedikasyon sa trabaho kan mga Pilipino.
