LEGAZPI CITY – Kinumpirmar kan alkalde kan banwaan kan Guinobatan, Albay na saindang pag-oolayan sa mangyayaring Sangguniang bayan sa maabot na Lunes an planong paramientras na pagpapasarado sa sarong poultry farm sa nasambitan na banwaan.
Marurumduman na haloy nang ipigrereklamo an nasambitan na farm huli sa suboot na langaw na kawsa kaini.
Sa intrevista kan Bombo Radyo ki Guinobatan Mayor Gemma Onjoco, pighayag kaini na alagad nasalinan na an ga nagrereklamong residentes, hasta sa ngunyan igwa pa man giraray na mga langaw sa mga kataraid na barangay.
Segun sa opisyal, kinakaipuhan sana na pakarahayon an operasyon kaini ngani na dae na maapektaran an mga residentes.
Kinakaipuhan na man suboot na makiaram kan lokal na gobyerno huli ta posible nang makaapektar sa salud an nasambitan na problema.
Mientrastanto, pinahimutikan man kan alkalde na igwang open dumpsite harani sa nasambitan na poultry farm na saro pa suboot sa mga pinaghahalian nin langaw.
