LEGAZPI CITY – Liwat na nangapudan an lokal na gobyerno kan Camalig sa mga miyembro kan rebeldeng New People’s Army na magsurindir na ngani na matabangan na makapagbagong buhay.
Sa intrevista kan Bombo Radyo Legazpi kay Camalig Mayor Caloy Baldo, padagos an pagtabang kan lokal na gobyerno sa mga nagsusurindir na rebelde sa paagi nin pagtatao nin mga ayuda.
Kaiba na diyan an financial aid, family food packs asin nagtatao pa nin livelihood programs.
Segun kay Baldo, nakatutok an lokal na gobyerno sa mga proyekto sa mga hararayong lugar siring kan farm-to-market roads ngani na madaling makapagbiyahe kan saindang mga produkto an mga paraoma.
Ipigrarani naman an serbisyo kan gobyerno sa paagi nin pagsasagibo nin mga medical missions na nagtatao nin libreng check up asin iba pang mga serbisyo.
Nakakatabang suboot ini ngani na maipamati sa mga residentes an pagtatrabaho kan gobyerno ngani na dae na maimpluwensyahan pa kan mga rebelde.
Mientras tanto, nagtao naman nin pasasalamat si Mayor Baldo sa mga residentes na padagos na nakikipagtabangan sa mga otoridad sa paagi nin pagreport sa presensya kan mga kalaban kan gobyerno.
