LEGAZPI CITY- Naka eksperyensya nin traces of ashfall an nagkapirang lugar sa banwaan kan Bacacay, Albay kasuudma, Hulyo 10, 2026, hali sa bulkang Mayon.
Segun ki Bacacay Municipal Disaster Risk Reduction and Management Office head Engineer Edgar Balidoy sa intrevista kan Bombo Radyo Legazpi na posibleng huli sa habagat kaya pasiring sa saindang banwaan an padpad kan abo hali sa bulkan.
Alagad light ashfall man sana suboot an na-eksperyensyan, tulos na nagbarewas nin facemask an lokal na gobierno para sa mga apektadong residente.
Obheto kaini na matawan nin proteksyon an mga namamanwaan sa epekto kan abo sa saindang salud, partikular na an mga bulnerableng residente.
Napag-araman na tulos man na nagsagibo nin kanya-kanyang paglilinig an mga apektadong residente ngani na mahali an nasabing abo sa saindang palibot.
Mientras tanto, sinierto man kan opisyal na padagos na nakabantay an lokal na gobierno sa nagpapadagos na aktibidad kan Mayon volcano.
