LEGAZPI CITY-Nagkondusir nin sarong miting an lokal na sangunian asin provincial government kan Albay mapadapit sa mga residentes na apektado nin pagbaha sa Barangay Masarawag Guinobatan Albay.
Segun kay Barangay Kagawad Romollo Llona, sa intrevista kan Bombo Radyo Legazpi, na napag-olayan apat na purok kun sain pigeebakwar kada igwang pagbaha, kairiba na an Purok 4, purok 5, purok 6, asin purok 8, asin kun pano mai-divert an pagbaha na dai magagi sa tinampo.
Pigpaplanuhan man suboot kan provincial government kan Albay na maghanap nin relocation site para sa mga nasabing apektadong purok.
Alagad sinabi kan opisyal na halawig pang proseso ini asin aadalan huli sa an plano digdi na palagpason sa ibang agihan an tubig.
Saro man suboot sa nahihiling niyang problema, iyo an pagkakaigwa nin 3 pang harong kun sain pigpaplanuhan na paagihon an tubig, alagad kakahurunon pa suboot ini ninda asin laoman na magpayag na ma-relocate.
Dagdag pa kan kagawad, na haloy naman suboot ining pigpaplano alagad huli sa 3 harong an matatamaan kaini kun sain dakulang kanal an kinakaipuhan gibuhon.
Suhestyon niya man na e-elevate an tinampo ngani makaagi an mga transportasyon asin malaagan ini nin tulay.
Enot naman suboot na nasanay an mga residente sa pagbaha sa saindang lugar kun sain nagaagi man sana ini asin dai naghahaloy nin pirang oras.
Nagin gawi naman suboot kan mga reisdente an paglalaag nin mga pigbabalagbag na ulang sa baha sa saindang harong siring kan mga kahoy.
Nagpahayag man nin suporta an mga residentes ngani ma-relocate kun sain basado suboot sa suhestyon ni Albay Governor Noel Rosal.
Sa presente, wara pa man suboot nin konkretong detalyes dapit digdi.
Abiso man kan opisyal sa mga residentes na pansamantalang magebakwar muna tuyong tag-uran huli sa kadakol asin halaba suboot ining proseso.
