Isiniwalat ni Batangas 1st district Representative Leandro Leviste na may kapot siyang mga ebidensiya na nagpapahiling nin pagtanggap nin kickbacks, na labi pa sa Cabral files.
Ipinaliwanag man kan mambabatas kun ngata dae pa niya ini ipigpapaluwas sa presente sa kadahilanang inabisuhan siya na bako pa ini an tamang panahon nganing gibuhon ini.
Alagad, nakahanda na suboot an mga video, nganing enkaso may mangyaring maraot sa saiya an maluwas an katotoohan.
Ginibo ni Rep. Leviste an pahayag kasunod kan claims ni Act Teachers Party-list Representative Antonio Tinio na mas maray na si Leviste an magbuyagyag asin magpaliwanag nin nilalaman asin kun pano niya nakuwa an mga rekord kan palitan nin text messages sa pagultangan suboot nina Presidente Ferdinand Marcos Jr. asin dating legislative liaison officer Adrian Bersamin, na magpapatunay suboot na aram kan presidente an mapadapit sa kickbacks hale sa maanomaliyang insertions sa pambansang pondo.
Segub kay Rep. Tinio, nahiling niya an mga record kan komunikasyon sa pagultangan kan presidente asin aking Bersamin poon Disyembre 2024 sagkod Hulyo 2025, na nagdedetalye kun saen eksaktong napunta an naunambitang kickbacks.
Mientrastanto, pigtuga man ni Rep. Leviste na nagrani sa saiya asin naki-olay an ina kan pirang kongresista kan administrasyon na magpasiring siya sa ibang nacion asin ipundo an pagbubuyagyag kan ebidensiya katakod sa mga proponent kan mga maanomaliyang proyekto kan DPWH.
Alagad, ipigdoon kan mambabatas na abo niyang magpasiring abroad. Sa oras suboot na magluwas an ebidensiya, digdi suboot maaaraman kun ngata siya inaatake huli ta natatakot sinda na iluwas niya an mga ini.
Sa ibong kaini, dae suboot siya matitinag sa mga warang basehang alegasyon asin nagtutubod na maluwas an katotoohan sa tamang panahon.
Naglalaom man si Leviste na maibunyag an katotoohan ninda dating DPWH USec. Roberto Bernardo, dating DPWH Sec. Manuel Bonoan kabale an dating mga kalihim asin undersecretaries kan Gabinete.
Sa hudyan, naglalaom si Leviste na wara ng testigo an magagadan, mahuhulog sa bangin o mapapa-silensyo.
Alagad enkaso man suboot na mangyari ini, mas maray na bayaan an saindang files, affidavit o recordings sa mapagkakatiwalaang indibidwal nganing dae malubong an katotoohan.
