LEGAZPI CITY – Kontra an election watch dog na LENTE Philippines sa pigbubusol ngunyan sa Kamara na pagpapalawig kan termino kan mga barangay asin Sangguniang Kabataan officials.
Base sa resolusyon na isinumitir sa Kamara hali sa presenteng tolong taon, planong gibohon na anom na taon na an termino kan mga opisyales kan Barangay.
Alagad sa intrevista kan Bombo Radyo Legazpi kay Atty. Ona Caritos an Executive Director kan LENTE Philippines, mahigot kaining kinontra an resolusyon huli ta posible ining magdara nin dakol na problema sa mga Pilipino.
Kung mapapalawig an termino kan mga barangay officials mas madidipisilan an mga residentes na may maluyang opisyal na dae naootob an saindang trabaho.
May posibilidad man na kung makalusot asin maging ley an pagpapalawig kan termino sa barangay officials, posibleng maging an local officials siring kan alkalde an maghagad man nin ekstensyon kan saindang termino.
Para sa election watch dog, imbes na pagpapalawig sa panahon nin pagtukaw sa posisyon, mas maray kung tututokan na sana kan Kongreso an pagpugol sa korapsyon asin pagtabang sa mga barangay officials na maging mas epektibo pa sa saindang trabaho.
