LEGAZPI CITY- Aminado an sarong election watchdog na dakol sindang nareresibeng reklamo dapit sa nagkapirang insidente nin vote buying asin iba pang bayolasyon ngunyan na panahon kan kampanya.
Kaibanan sa mga ini an paggamit kan resources kan gobierno urog na kan mga incumbent officials.
Segun ki LENTE Philippines Executive Director Ona Caritos sa intrevista kan Bombo Radyo Legazpi na dakol man an nareresibeng mga report dapit sa bastos na pahayag kan nagkapirang mga kandidato.
Sinabi kan opisyal na bako na bago an nasabing mga bayolasyon alagad inomaw kaini an mas marikas na aksyon ngunyan kan Commission on Elections.
Sa presente kaya, mas madaling pigpapanimbag kan komisyon an mga personalidad na imbwelto sa nasabing mga bayolasyon.
Aminado an grupo na kinakaipuhan na mapanimbag an mga violators ngani na dae na mautro pa an nasabing mga pang-abauso.
Mientras tanto, nangapudan man si Caritos sa mga nagpapaabot nin report na makipag koordinar sa sainda ngani na dagos na masundan nin kaso an mga personang ipigrereklamo.
