LEGAZPI CITY – Makalihis an matrayumpong preparasyon sa kakatapos pa sanang Port District Fiesta, pighahandaan na man ngonian kan Legazpi Task Force Kalinigan asin Kaayusan an pag-obserbar kan Undas 2025.
Segun sa pamayo kan grupo na si Andy Marbella sa intrevista kan Bombo Radyo Legazpi na nakatalaan sindang magsagibo nin final coordination meeting kabale an mga law enforcement agencies sa maabot na Oktubre 28 nganing pag-olayan an lakdang na saindang gigiribuhon.
Piglalaoman suboot ninda an pagruso kan mga tawo sa mga sementeryo sa ciudad nganing bisitahon an saindang mga namaaram nang mahal sa buhay kun kaya saro ini sa saindang babantayan.
Ipapakalat man an saindang mga personahes nganing magtaong asistensya mantang plano man nindang magbugtak nin mga barikada nganing mamantenir an bulos kan mga tawo na malaog asin maluwas kan kamposanto.
Pigtaram pa kan opisyal na nagtetenir na angat sainda pagkatapos kan obserbasyon iyo an basura kun kaya pig-eenganyar ninda an publiko na imantenir an disiplina sa tamang pagtapok kan saindang mga kinaunan asin ininuman tuyong nagbibisita maski sa ibang lugar.
Punto niya man na maski may mga nakabantay na mga eco-aide sa kada kamposanto para sa paglilinig an mas maray man suboot kun naka-segregate na an mga basura nganing dae na ialokar kan mga eco-aide an saindang oras sa pag-bulag kan mga basurang nalalapa kaysa sa bako.
Nangapodan man si Marbella sa mga opisyales kan mga sementeryo sa ciudad kabale an mga barangay kan Padang, Rawis, asin Bonot na kaipuhan an saindang presensya sa pagbabawal sa mga nagtitienda nin warang special permit hale sa gobierno lokal nganing mamantenir an pazy orden sa kabilugang durasyon kan Undas.
