LEGAZPI CITY – Piglatag na kan Legazpi City Public Safety Office an saindang security measures sa isasagibong peace rally kan religious group na Iglesia ni Cristo sa syudad saaga.
Magigirumduman na isasagibo ini kan iba pang mga grupo na nagmamawot suboot nin kaliwanagan sa isipan kan mga namamanwaan para sa katuninongan asin kaayusan.
Segun ki Legazpi City PSO Chief Octavio Reviro sa intrevista kan Bombo Radyo Legazpi na nagkaigwa na sinda nin mga serye nin pag-orolay kan naunambitang grupo nganing mapadapit sa aktibidad.
Warang mangyayaring road blocking asin re-routing sa mga tinampo na aagihan kan rally partikular na sa mga tinampo pasiring sa Sawangan Park.
Piglalaoman na dakol an maabot na mga miyembro kan INC kun kaya ipapakalat kaini an saiyang mga public safety officer nganing mabantayan na nagpa-park nin maray nganing maibitaran an traffic.
Pigtaram pa kan opisyal na makakakasabayan ninda magbantay an 250 na mga uniform personel nganing maibitaran an presensya kan masamang elemento o anumang aberya sa lugar.
Nagbugtak na man sinda nin paramientras na pahingaloan kan mga miyembro kan grupo sa may Ibalong Centrum for Recreation, Convention hall asin sa Peoples Park.
Naka bandera na man an red alert sa mga hospital sa syudad sa nganing tulos na marespondehan an makikisumaro sa aktibidad na kinakaipuhan nin atensyong medikal.
Nangapodan ini sa mga traysikel driver na dae pagsamantalahon an magigin ruso kan tawo saaga nganing makapanlamang sana nin kapwa sa paagi kan pag-overcharge kan saindang mga singil nin huli ta dae sinda maduwang isip na dakupon asin kompiskaron an saindang traysikel.
