LEGAZPI CITY—Padagos na pigmo-monitor kan Legazpi Public Safety Office an mga colorum na traysikel sa ciudad kan Legazpi.
Segun ki Public Safety Office, Legazpi head Octavio Rivero, sa intrevista kan Bombo Radyo Legazpi, maabot na sa walong traysikel an na-impound kan saindang opisina puon pa kan nagkundusir nin National Rally for Peace sa lugar, na kun saen mantang nagmamanehar nin trapiko an mga traffic enforcer nahiling kan mga ini an mga nagkapirang traysikel na nagkukua nin mga pasahero maski na warang prangkisa.
Sinabi kaini na an ibang presidente nin mga traysikel na lehitimong nagpapasada naghahagad na nin tabang na dakupon an mga colorum huli ta imbes na mga lehitimong mga traysikel na may prangkisa an lulunadan kan mga pasahero—naaagawan suboot kan mga colorum an saindang hanapbuhay.
Segun sa opisyal, an madadakop na mga colorum pwedesir na magmulta nin P3,000 para sa 1st offense, mantang P5,000 para sa 2nd offense.
Mientrastanto, abiso man kaini sa publiko na dae magsakay sa mga colorum na tricycle huli ta dae simbag kan drayber an saindang insurance sa oras na magkaigwa nin aksidente.
