LEGAZPI CITY—Padagos na naka-monitor an mga personahes kan Legazpi PNP sa pagmanehar kan bulos nin trapiko sa ciudad makalihis na maobserbaran an pagruso kan mga mall goers pagkatapos kan 2025 midterm elections.
Segun ki Legazpi City Police Station Public Information Office, Police Executive Master Sergeant Carlos Paña, sa intrevista kan Bombo Radyo Legazpi, sagkod sa ngunyan may mga personahes pa sindang nakabugtak sa mga terminal sa nasabing ciudad.
Dugang kan opisyal na nanotaran man an pagkakaubusan nin mga pampasadang behikulo na pasiring sa primer o terser distrito kan probinsya, magin an pasiring sa norteng parte o upland na mga lugar kan Legazpi.
Segun saiya, kumparar kan mga nakalihis na aldaw nagigin normal na an bulos kan trapiko pag-abot kan alas-7 nin banggi.
Alagad sa presente, maski lagpas nang alas-7:30 nin banggi, maoobserbaran man giraray an magabat na bulos nin trapiko.
Mientrastanto, sinabi pa kan opisyal na wara man sindang nairehistrong untoward incidents bago pa man an aldaw kan eleksyon, afuera na sana sa nagkapirang aksidente nin mga behikulo.
