LEGAZPI CITY—Padagos an pag-imbestigar kan Legazpi City Police Station sa nangyaring insidente nin panghahabon sa opisina kan Girl Scouts of the Philippines sa Barangay Gogon sa ciudad nin Legazpi.
Segun ki Police Executive Master Sergeant Carlos Paña, an tagapagtaram kan Legazpi City Police Station, sa intrevista kan Bombo Radyo Legazpi, na sa pagresponde kan saindang kapulisan nagkalat na suboot an mga kagamitan sa opisina.
Susog sa report, pig-estimar na maabot sa P186,000 an kabilogan na kantidad kan mga nawawarang ekipahe, kairiba na digdi an duwang laptop, sarong karaoke, sarong TV, projector asin printer.
Sa ngunyan an saindang ahensya nagkundusir na nin back track kun saen saro man sa mga pighiling nindang anggulo iyo an pag-trace kan mga nakaruluwas sa presohan na nagserbi na sa kulungan asin posibleng nag-atake na naman liwat asin siring man an pag-imbestigar sa nilunadang behikulo kan mga suspetsado.
Nangapudan man an opisyal sa publiko na en kaso may naipabakal kan siring na nawawarang mga ekipahe makipagtabangan sa sainda para maresolbaran an nasambitang insidente asin siring man sa mga posibleng nakahiling kan insidente na makipagkoordinar o magtao nin impormasyon sa sainda para mamidbid na an mga suspetsado sa nangyari panghahabon.
