LEGAZPI CITY- Liwat na nagpapadagos ngunyan an konstruksyon kan Legazpi City Museum makalihis an paramientras na pagkaka octaba kaini asin pinaglalaoman na matatapos sa masunod na taon.
Segun ki Dalito Perez, pamayo kan nasambitan na museyo, napundo an konstruksyon kaini huli ta igwang prayoridad na pinagamitan kan pondo kan syudad.
Dugang pa kaini na sa ngunyan inaprubaran na ni Mayor Noel Rosan an pondo kaini na uminabot sa poco mas o menos P5 million para sa duwang phase kun saina an enot iyo an mismong building asin an gigibuhon na exibit palaog digdi.
Segun ki Perez, magigin kakaiba ini sa iba pang mga museyo huli ta mas magigin interactive an Legazpi museum sa mga mabisita digdi huli ta ipi-feature kaini an bilog na historya kan syudad kan Legazpi puon kan pre-colonial period.
Magkakaigwa suboot nin guide palaog an mga bisita ngani na maisalaysay an istorya kan syudad asin dakakol na maadalan an mga mabisita digdi asin mas mamatean kun ano an historya kan Legazpi.
