LEGAZPI CITY – Pinakusog pa kan Legazpi City Veterinary Office an monitoring asin surveillance ngani na mamantenir na African Swine Fever (ASF)-free an ciudad.
Mismong si Mayor Noel Rosal an nagsugo kun kaya pigtatawanan nin panahon an enforcement kan ley ngani mapugulan an mga mishandled asin hot meats na posibleng magin rason kan paglaog kan helang.
Sa intrevista kan Bombo Radyo Legazpi ki City Veterinarian Dr. Emmanuel Estipona, notorious an mga processed mear sa pagdadara nin helang siring kan nangyari sa Masbate.
Grabe man an pagbalgar kan nagkapira lalo sa mga dokumentong iba man an nakasurat asin kargamentong pork meat products palan an laog.
Aminado man si Estipona na enot na ves sindang makadakop kan mga imbwelto sa online selling na nagpabakal nin mishandled asin misrepresented processed products sa ciudad.
Nanindogan an opisyal na sasangaton nin kaso an mga nadakop, magpositibo man o dai sa ASF an mga nakumpiskar na pork meat products.
Abiso pa ni Estipona sa mga parabakal na ngani makalikay sa mga karneng bako salbado sa helang, mas maray kun sa merkado na sana magbakal asin siertuhon na nag-agi sa slaughterhouse an karne.
Inagyat man ni Estipona an pagtatarabangan urog pang an mga local hog raisers man sana an pinakamaapektaran en caso makalaog na an helang sa ciudad.
