LEGAZPI CITY — Nagpatanid si Legazpi City Mayor Noel Rosal sa mga ATV asin quarry operators na naglalaog man giraray sa danger zones sa ibong kan pigpapaotob na ‘Strictly No Human Activity’ Policy.
Pigduon kan alkalde na kinakaipuhan na sumunod sa pigpapaotob na kasuguan ngani na masierto an seguridad kan mga ini katakod kan peligro na dara kan aktibidad kan Bulkang Mayon.
Segun sa opisyal, kakanselaron an business permit kan mga operators na madadakop na naga-operate sa PDZ.
An nasambitan na pahayag an katakod kan nareresibeng impormasyon na nagpapadagos man giraray an paglaog kan mga ini sa 6-kilometer permanent danger zone hanggang sa 8-km extended danger zone.
Katakod kaini, nagpaluwas nin kasuguan si Rosal sa Legazpi City Police na mas pahiguton an pagbabantay sa mga danger zones urog pang padagos na nagmamatagas an nagkapirang operators.
Marurumduman na kan nakalihis na mga aldaw, igwang duwang foreign scientists na nasita kan mga otoridad makalihis maglaog sa danger zones kan nag-aalburutong bulkang Mayon.
Mientrastanto, pinaglalaoman man na maabot sa masunod na mga aldaw an P1 million na cash asisstance hali sa Philippine Charity Sweepstakes Office (PCSO) asin P1 million man hali ki San Juan Mayor Guia Gomez.
Napag-araman man na uminabot na sa P11 million hali sa P15 million na calamity fund kan syudad an nagastos para sa mga evacuees sa laog nin sarong bulan kaya haros P3 million na sana suboot an natatada para sa Legazpi City.
