LEGAZPI CITY- Ipinaliwanag ni Legazpi City Mayor Alfredo Garbin Jr. an pagpapaluwas nin memorandum dapit sa dae na pagpapadagos kan trabaho kan mga job orders puon sa Enero 1, 2025.
Segun sa alkalde na maski dae magpaluwas nin memorandum nakatalaan man talaga na magtapos an kontrata kan mga ini sa Disyembre 31, 2024.
Sa presente pigsugo kan alkalde an mga department heads na i-assess an mga akomplishimento kan mga job orders asin an mga matanos na nagtatrabaho an posibleng makapagpadagos pa sa serbisyo.
Ibinuyagyag kaya ni Mayor Garbin na puon kan magtukaw siya sa posisyon, nadiskubre an labi sa 370 na mga job orders na dae man naglalaog sa trabaho o maaapod na ghost employees.
Pinangaranan pa kan opisyal an nagkapirang personalidad na suboot nagreresibe nin sweldo maski pa dae man nagtataong serbisyo sa lokal na gobierno asin sa publiko.
Sa presente sinabi kan alkalde na nagtitipon siya nin ebidensya ngani na mapanimbag an suboot responsable sa pigtataram na ghost employees kan lokal na gobierno.
