LEGAZPI CITY—Pinahimutikan kan Legazpi City Police Station an nangyaring insidente nin suboot pagbalong pagkua sa 14-anyos na lalaki sa may parte kan Rawis Elementary School sa ciudad kan Legazpi, Albay.
Segun ki PIO Legazpi CPS PEMS Carlos Paña, sa intrevista kan Bombo Radyo Legazpi, na susog sa saindang dinalan na CCTV kan Pebrero 17 sa lugar, na iyo man an petsa kan pag-blotter kan biktima asin nangyari suboot ini bandang pagkahapon—pigtaram kaini na wara man sinda na nadalan sa CCTV nin siring na insidente.
Dugang digdi na dae naman ninda nakaolay an aki o an pamilya kaini nin huli ta wara na ini sa nasambitang lugar.
Posible man na magkondusir an saindang ahensya nin mas hararom na imbestigasyon en kaso man na may katotoohan an insidente.
Nagpagiromdom man ini lalo na sa mga nagpapakalat nin siring na impormasyon sa social media na magin responsable huli ta pwedesir ining magkawsa nin pagkahadit asin takot sa publiko.
Pigtaram pa kan opisyal na posible man na mahampang an mga indibidwal na nagpapakalat nin salang impormasyon sa kasong cyberlibel.
Mientrastanto, abiso man kaini sa publiko na maghagad nin tabang sa mga otoridad kun may maobserbaran sindang kakaiba sa saindang palibot.
