LEGAZPI CITY – Puga puga na ang ipigsasagibong inspeksyon asin monitoring kan Legazpi City Smoke Free Unit sa mga eskwelahan sa ciudad na gagamiton bilang billeting centers sa paparaning Palarong Bicol 2025.
Segun ki Legazpi City Smoke Free Unit Enforcer Jose Balbin sa intrevista kan Bombo Radyo Legazpi na nakikipagkoordinar na an City Health sa mga coordinators kan palaro nganing mamantenir an zero smoking and zero vaping sa mga lugar kun sain matenir an mga delegado na gikan pa sa manlain-laing provincia kan rehiyon Bicol.
Magsasagibo man sinda nin paglilibot-libot asin pagsita sa mga mabayolar sa ordinansa bisita man o residente kan ciudad.
Mamonitor man an saindang grupo sa mga playing venue sa bilog na durasyon kan pakawat nganing magpa-otob kan No Smoking Ordinance nin huli ta mga jovenes an kabale digdi.
Pigtaram pa kaini na ipapasabot man sa mga delegado asin bisita na bawal an pagsigarilyo asin paggamit kan vape sa ciudad alagad kun paulit-ulit nang nadadakop asin nasisita an sarong indibidwal, tatawan na ninda ini nin citation ticket bilang penalidad kan ordinansa.
Base sa saiyang obserbasyon na kada may pigsasagibo na siring kaining aktibidad sa ciudad, may mga nagkapirang billeting center na wara sindang nahihiling na nagbabayolar alagad igwa nang mga upos kan sigarilyo pagkaaga.
Nakaka-apektar man suboot ini sa mga eskwelahan sa ciudad sa pag-qualify ninda sa pigigibo nindang taunang award para sa smoke free schools.
