Nangapudan an Public Safety Office kan Legazpi City sa publiko makalihis an insidente kan panraraot nin salming kan mga kotse na kinasasangkutan kan bukas kotse gang.
Segun kay Rolly Esguerra, an pamayo kan Legazpi City Public Safety Office sa intrevista kan Bombo Radyo Legazpi na pigraraot an salming nganing makuwa kun may pwede ini habunon na mga kagamitan asin nabuhay liwat an nasabing modus nin huli ta taong 2007 pa an huring naitalang insidente.
Pigtaram man kaini na nakapagtala sinda nin duwang insidente ngunyan kun sain nakaparada an saro sa parking lot kan sarong hotel asin nagparada man an saro nganing magbakal sa sarong shop.
Pigtawan doon pa kaini na sarong tawo man sana suboot an may taggibo nin huli ta bako man arayo an distansya kan pinangyarihan kan duwang insidente asin naka-bisikleta suboot an suspek.
Segun pa kay Esguerra na wara man nakuwa alagad dakulang perwisyo an pagpasa nin salming sa mga kotse ta pigpupokpok suboot nin matagas na bagay asin pigpapatos sa bado o tela nganing dae makawsa nin ribok asin mapansin ki mga publikong naglalakaw.
Pigtaram pa kaini na pigpupuntirya suboot an mga kotse na nakapark sa mga liblib na lugar asin under investigation suboot an insidente nganing masusog kun sisay an taggibo sa naunambitang insidente.
Nagpagirumdom man ini sa publiko na mag ingat asin mantiniron an personal safety asin magpili nin bako delikado na parking nin huli ta naglaog na nasyon sa “ber” season kasabay man kan pangapudan na magpaapod nin meeting sa mga parking attendant asin tukaron kun paano iibitaran an mga siring na insidente.
