LEGAZPI CITY – Nagbiyaheng Manila an alkalde kan ciudad kan Legazpi tangarig na resibihon an ipigpromesang tabang kan City Government kan Taguig sa panahon pa kan pag-aalburoto kan Bulkang Mayon sa Albay.
Sa intrevista kan Bombo Radyo Legazpi ki Mayor Noel Rosal, nakatalaang gamiton an P500, 000 na asistensya sa ipigpapatugdok na permanent evacuation centers sa Brgy. Homapon kan ciudad kun sain nasa tulong ektarya an nabakal na daga.
Pag-eksplikar pa kan alkalde na mismong si House Speaker Allan Peter Cayetano an nagpa-apod sa mga banwaan asin ciudad sa Albay na beneficiarion kan tabang, susog naman sa ipig-ofrecir kan agom na si dating Taguig Mayor asin presenteng Congw. Lani.
Dugang pa ni Rosal na bentahe an pagkakaigwa nin permanent evacuation centers tangarig na bako apektado an mga klase sa mga eskwelahan na nagsisirbeng temporary shelters kun may mga kalamidad.
Afuera ki Speaker Cayetano, ma-kurtesiya man an alkalde sa oficina kan Ako Bicol Party-list asin Cong. Joey Salceda.
