LEGAZPI CITY – Nagsurat na an lokal na gobierno kan Legazpi City sa kumpanyang AztraZeneca ngani magpa-reserve nin COVID-19 vaccine.
Sinabi ni Mayor Noel Rosal sa Bombo Radyo Legazpi, haros 90% kan populasyon o labi sa 135, 000 indibidwal an kaibanan sa nakalistang matatawanan kan bakuna.
Mas hibaba ini sa orihinal na 193, 000 katawo huli ta hinali sa listahan an mga edad 17-anyos pababa na bako pa kwalipikadong bakunahan.
Alagad sa ngunyan, nasa waiting list pa an ciudad makalihis na dai makasabay sa first batch kan nag-order.
Pighahalat na sana an opisyal na pagpirma sa order asin kasunduan para sa bakuna na mangyayari sana kapag available na an suplay.
Mientras tanto, ipinaaram naman sa mga LGU na pwede na an tripartite agreement sa pagultanan kan lokal na gobierno, national government asin vaccine manufacturer.
Sa babakalon na bakuna, 30% an share sa ibang LGU na warang kakayanang makabakal nin bakuna.
Piglinaw man ni Rosal na nakabase man giraray sa desisyon kan indibidwal kun mawot na magpabakuna.
Mapakondusir man nin survey dapit digdi sa paagi kan idedesignar na QR codes para sa ciudad.
