LEGAZPI CITY – Nagtaong pagirumdom an Legazpi City Local Government Unit sa mga Barangay Official mapadapit sa tamang paggamit kan ipig-distrebwer na mga rescue vehicle.
Segun ki Legazpi City Mayor Alfredo Garbin Jr. sa intrevista kan Bombo Radyo Legazpi na mahigot niyang patanid na dae pwede gamiton an mga rescue vehicle sa pangsadiring lakad asin ano mang klase nin kapricho kan mga barangay officials.
Tinao suboot sainda ini nganing makataong tabang asin mobility sa mga barangay sa oras kan pagresponde sa ano mang klase nin kalamidad, emergency asin pati man an offical activities.
Posible mang maghaloy an magayon na quality kan saindang rescue vehicle alagad madepende na sana suboot kun papano ini papangatamanan kan mga opisyal kan barangay.
Pigtaram pa kan opisyal na uminabot sa 45 an behikulo na ipigdistribwer sa mga barangay sa ciudad na dae natawan kan parehong inisyatiba kan nakaaging administrasyon asin na beripika na wara pang rescue vehicle.
Responsibilidad na man suboot kan mga barangay officials an gastos asin budget para sa maintenance asin krudo na magagamit kan nasabing behikulo.
Paglilinaw man ni Mayor Garbin na pwedesir an maski sisay man magsunad nin complaint kun makahiling sinda ki mga opisyal kan barangay na piggagamit an government vehicle sa pansadiring lakad asin tulos man ninda ini tatawan nin magkakanigong aksyon.
