LEGAZPI CITY — Ipiglatag ni Legazpi City Mayor Noel Rosal an nagkapira sa mga programa kan syudad na padagos na pigpapaotob asin pigtatrabaho hasta sa ngunyan.
Segun sa alkalde, padagos na pigkokunstruir ngunyan an Legazpi City Hospital asin pighahalao na sana an iba pang mga ekipahes na kinakaipuhan sa pagbulong sa mga pasyente.
Pigbuyagyag man kaini na sa masunod na taon, posible man na magamit na an nasambitan na ospital huli ta haros kumpleto na an mga kagamitan digdi kun sain nakaresibe nin mga donasyon hali sa Department of Health (DOH).
Dugang pa kan opisyal na kadaklan sa mga pondo na ginamit sa nasambitan na ospital an kinua mismo sa budget kan lokal na gobyerno kan Legazpi kaya target na mabuksan tulos ini ngani na maserbisyuhan na an mga namamanwa.
Mientrastanto, kaibanan man sa pigtututukan ngunyan kan LGU an mga motorista na naga iligal na naga park na nagpapapiot suboot sa bulos kan trapiko.
Pag-eksplikar kaini, kaipuhan nindang tabangan an Land Transportation Franchising and Regulatory Board (LTFRB) sa pagmamanehar sa tinampo urog pa ngunyan na nagdadakol an mga violators.
Dugang pa ni Rosal na nakatalaan man na puunan an road widening sa nagkapirang barangay sa syudad kan Legazpi.
